MENDEN BETER

Güýz şemaly ýapraklary yranda

Durnalar asmanda guranda hatar

Günler öwrüm berip öňe ýörände

Men saňa garaşdym, sen menden beter

Daň säherler pyntyk ýaranda güller

Bilbilden gönderen salamym ýeter

Garaşýan sözüni gaýtalap diller

Säher ýola bakýan, sen menden beter

Guramaz bag kökünde bolsa nemi

Gaýta şahalary gol ýaryp biter

Güllere düşende asmanyň şemi

Men asmana aşyk, sen menden beter

Ýeke galsaň meni küýsese ýürek

Şygryma ýüzlenseň üstümden elter

Diňe säher galar ornuma derek

Men säheri söýýän, sen menden beter

Sähäriň howasyn saňa deňeýän

Sen bolmasaň säher howasam ýiter

Men güliň aşygy, sen sähra güli

Men seni küýseýän, sen menden beter