Nesip etse hor eşegem
Bir begzadaň maly bolar
Kimler ir, kimler giç düşüner
Nesibäňde bary bolar.

Din ymmata şüpheliler
Hak islese kary bolar.
Geljegiňi bir o biler
Nesibäňde bary bolar.

Beglere näz eden hüýrler
Bir çopanyň ýary bolar.
Dostum muňa ýazgyt diýrler
Nesibäňde bary bolar.

Alla saňa ogul berse
Alty, Bäşim, Çary bolar.
Asman gaçyp, ýer çöwrülse
Nesibäňde bary bolar.

Ömür boýy mal-mülk gözlän
Öz nebsine tazy bolar.
Baýar, taňra şükür eýlän
Nesibäňde bary bolar.

Awtory Kerim Hallyýew.