MENIŇ SÖÝGIM

(Ýüzbe-ýüz janyňa kast etse gandar,
Onuň keşbi meýdiň gözünde galýar..)

Serediň möwç urup gelen bahara,
Ol türkmeniň ýöne-möne ýazy däl.
Kesir gyza yrylmaga bahana,
Ýazyň gözelligi çydar ýaly däl.

Şol ýazy kalbyma sygdyryp bilmän,
Men goşgy-gazaldan karar gözledim.
Eger bir gün ölsem, görüň şol ýazy
Emaý bilen açyň-da siz gözlerim...

Meniň ýalňyz syrym—nowjuwan gelin,
Gören däldir hiç kim men kimin söýlüp.
Ol hakda ýazmaga bognum ysmady
Onuň jemalyny ýoýaryn öýdüp.

Men gidip daglara içimi dökdüm,
Güýjedip meý deýin göwnümde baryn.
Eger bir gün kaza bolsam, görüň siz
Gözüm açyp şol geliniň didaryn...

Nobatguly Rejepow