Kim kimden üýtgeşik,kim kimden artyk?

Aýby ýokdur donuň bolsa-da ýyrtyk,

Daşyna müň dürli hiläni serpip

Ýürekde kir saklan ýüzler utansyn.

Eklenjiň aýby ýok iş bolsa halal,

Rysgalyň Hak berse ýagşyňa ýarar.

Edebin,ekramyn saklanda aýal

Betniýetli bakan gözler utansyn.

Der dökesi gelmez mugdy halaýan.

Görüpler bar,ädimiňi sanaýan.

Belentligiň eteginde saýalan,

Dag gadryn bilmeýän düzler utansyn.

Gözlän tapar,ýürek bilen agtaryp.

Ussa çykmaz şägirt ýatsa ýaltanyp.

Käte dünýäň hilesine aldanyp,

Hudaýy unudýan"bizler"utansyn.