“Indä gyş gutardy” diýlen pursatda,

Ownujak gar tozgalary galgaýar.

Käte şeýle işler bolýar dünýäde,

Tebigatam adamlary aldaýar.

Ynam edip, käte ynsan ynsana,

Özünde bar pikirlerin baglaýar.

Käte garaşan tamaňam çykanok,

Pikirlerem adamlary aldaýar.

Hasrat laýyna batanda kä ynsan,

Arak bilen keýplerini çaglaýar.

Dogry ýoly gözlemäge çalşanok,

Şeýtan mydam adamlary aldaýar.

“Plan günden plan zat bolmalydyr hökman”-

diýip ynsan geçen günin sanaýar.

Emma “nesip bolsa” ýada düşenok,

Hasaplaram adamlary aldaýar.

Kakasyndan aýra düşen çagajyk,

“Bir gün kakam geler” diýip aglaýar.

Umyt baglan kakasy-da gelenok,

Käte umyt adamlary aldaýar.

“Seret oňa,

Ol mydama şadyýan

Şatlyk bilen ähli zady jaýlaýar”

Içdäki gaýgyny hiç kim bilenok,

Daşky şatlyk adamlary aldaýar.

“Bolan işde bir zadyň günäsi bar”-

diýip hemme öz-özüni goldaýar.

Emma bar zadyň gözbaşy ynsanýet,

Ynsan mydam öz-özini aldaýar...

Ylham GURBANALYÝEW

2021