SEN MENI KÜÝSÄRSIŇ

Sen meni küýsärsiň ýalňyz çagyňda,

Küýsärsiň bir zada begenen wagtyň.

Ýaşarsyň gaplanyp arzuw-hyýala,

Dünýäme dolanyp gelmejek bagtym.

Sen meni küýsärsiň, men ony bilýän,

Hem ýatlarsyň bala dönen günleri.

Şol pursat ejizlär mert bolan göwnüň,

Adymy tutarsyň ysgap gülleri.

Sen meni küýsärsiň soňky deme çen,

Gözlerimi göz öňüne getirip.

Bu pany dünýäde armanyň galar,

Gitseň-de sen mundan ömrüň ötürip.

Sen meni küýsärsiň baharda-ýazda,

Geçennem duýmarsyň ömüriň, wagtyň.

Bagtly pursatlar galypdyr yzda,

Wah, indi gujagma dolmajak bagtym.

Bahargül Mejidowa