Ir bilen oýanýañ, Öýüñ ýerbe-ýer.

Keýpiñ kök, janyñ sag, Hudaýa şükür,

Goñşyñdan bir dertliñ nalasy gelýär.

şonda näme hakda edersiñ pikir?!

Öýüñdäki ajap sapa hakdamy?

Ýa şol dertlä gerek şypa hakdamy?

Ynha bir edara. Başlygy - dostuñ.

Ikiñiz içerde "kikirde-kikir".

Gapyda kyrk adam garaşyp otyr.

Şonda näme hakda edersiñ pikir?!

Dostlukdaky täsin gudrat hakdamy?

Ýa-da ishikdäki nobat hakdamy?

Saklandy gapyñda kerpiçli maşyn.

Maşynyñ şafýory bir ogry mekir.

"Ýarpy bahasyna al şuny!" diýýär.

Shonda näme hakda edersiñ pikir?!

Jübiñe bähbitli arzan hakdamy?

Ýa kellä bähbitli wyždan hakdamy?

Ynha et dükany. Satyjy goñşyñ.

Saýlap-seçip saña bir budy çeker.

Yzyñdaka bolsa - gaty oñurga.

Şonda näme hakda edersiñ pikir?!

Özüñe edilen hezzet hakdamy?

Ýa ili çürkeýän ülpet hakdamy?

Barýar köçe bilen maýyp weteran.

Diñe maýybam däl, bir gözem sokur.

Sen bolsa 'Wolgaly' dazlap barýarsyñ.

Shonda näme hakda edersiñ pikir?!

Öz ornuñ, öz parhyñ, 'Wolgañ' hakdamy?

Ýa 'Wolga' ýetiren pälwan hakdamy.

AWTORY: KERIM GURBANNEPESOW

👇❤️