Ýa döwür üýtgedi, ýa-da adamlar,

Her kim öz nebsine ýeňilip barýar.

Mukaddes saýylýan, söýgiň gymmaty,

Çagaň oýunjagyna deňelip barýar.

Toý-ýasyňa, tanyşlaň ir gelerdi,

Kyn günüň ýanyňa dost-ýar gelerdi,

Bolmanda, gapyňdan hossar gelerdi,

Dogan, garyndaşam kemelip barýar.

Namardy kän eken, dünýäň merdinden,

Kyn işleri, düşürdiler gerdenden,

Iki ýüzli, ýalançylaň derdinden,

Sadalaram ýüpsiz daňylyp barýar.

Öňler ähli zadyň bardy çyzygy,

Geçýän günleriňem gaçdy gyzygy,

Indi, adamlaryň adamçylygy,

Adamlaň özünden öň ölüp barýar.

Kuwwat_Ýazmuhammedow