Özüň bilýänsiň…

Men seň bilen Islandiýa gitjekdim,

Arzuwymyz Reýkýawige uçmakdy.

Il-günden söýgümiz ýaşyryp ýörkäk,

Tanalmaýan ýerlerimiz — uçmahdy.



Öwha ýelleň, sowuk suwlaň ýurduny

Saýlapdyk kartada oturşyn halap.

Bugartmak isläpdik howrumyz bile

Buz tutan aýnasyn bir myhmanhanaň…



Syýahat etjekdik,

hökman gitjekdik,

Ýanardaglaň, geýzerleriň mesgenne.

Stadionda owfullaşyp, güýjeýän

Island janköýerleň meşhur seslerne

Ses goşup görjekdik, gygyryp bile.

Ol ýerlerde toý tutmagam asan-a.

Aşgabatdan galkjakdyk biz bileje,

Alkyş aýdyp uçarlary ýasana.



Uçmadyk.

Gitmedik.

Toýam tutmadyk,

Özara paýlaşdyk Islandiýanam:

Seň ýüregňe onuň sowugy doldy,

Meniň bolsa magma ýaly ýanýanym

Özüň bilýänsiň.

Seýitmyrat GELDIÝEW.