Dünýañ hiç bir galmagaly bozmasyn,
Ümsümligni uklap ýatan şäherleň.
Goý,adamlar ýagşylygy oňlasyn,
Gowulygy buşlap gelsin säherler.

Salkyn gije giňlik berýär göwnüme,
Hyýallarym göge gurýar merdiwan.
Arzuw edýän,
sebäbi bu ömrümiň,
Entek öňde düzülmeli bendi bar.

Sönmesin hiç içimdäki höwesim,
Yhlas eden bende myrada ýetsin.
Ýazlar dolsun güýzki yitgiň öwezin,
Zeminde ähli zat öz ornun tapsyn.

Ýol bermäliň göwnüň döwülmegine,
Öýkeleri öwsen ýeller äkitsin.
Ynsanlaň kirjigen göwünlerine,
Ýagmyrlaram şypa suwun akytsyn.

Şanazar Hydyrow