Goşgynyň nähili dogulşy hakda
Köp gezek, köp ýerde berdiler sowal.
Goşgy hem çagaňdyr. Ýöne möhleti
Dokuz, aý, dokuz gün,
Dokuz sagat däl.

Käte ony bir ýyl çaýkap gezersiň,
Käte-de dokuz ýyl,
Käte-de on ýyl.
Biri öýde doglar, birisi ýolda –
Käte-hä gyz bolar,
Käte-de ogul.

Gyz goşgular bägül ýaly näzikdir.
Erkekleri goç şahy dek gödekdir.
Berildigi bolsun!
Bägülmi, şahmy –
Jaý ýerinde ikisi-de gerekdir.

Kerim Gurbannepesow