Meniň ýigit wagtym seniň gyz wagtyň!

(Goşulmadyk bentler şahyryň arhiwi)


Ne-hä eşik bardy ne-de bir çörek
Ne-de gidenlerden bilerdik derek
Söýüşmäge ýürek gerekdi ýürek
Meniň ýigit wagtym
Seniň gyz wagtyň

Şonda-da käteler bälçiräp içgin
Diýerdik:Söýüşmek hemme wagt mümkin
Öýlenmek-gerek zat köpelmek üçin
Urşuň gazap wagty
Adam az wagty!

Bir ýyllap degmändi lebiňe lebim
Diňe gatyşypdy demiňe demim
Soň bir gün bozuldy beýle edebim
Meniň Jeýhun wagtym
Seniň ýaz wagtyň

Buşlap Ýeňiş bilen gutaran urşy
Aldygyna ýüwürdim öýňüze garşy
Buşlugmy lebiňden üzüldim ýagşy
Meniň ýigit wagtym
Seniň gyz wagtyň...


Kerim Aga-ň setirleri