INDEÝ

Amerikan işewürleriň biri «Aýlaň-çaýlaň edip geleli» diýip, indeý dostuny täze satyn alan sport ulagyna mündürýär. Münüp münmänkä-de, bar güýji bilen gaza basyp, ulagyny örän ýokary tizlikde sürüp ugraýar welin, gorkudan ýaňa indeýiň ýüregi agzyna gelýär. Ýöne ol şonda-da sesini çykarman oturýar. Aýlanyp bolansoňlar, indeý ulagdan düşýär-de, asfaltyň üstünde bagryny berip ýatýar. Işewür geň galyp, ondan:

– Bu näme etdigiň bolýar? – diýip soraýar. Şonda indeý:

– Ruhumyň bedenimiň yzyndan ýetmegine garaşýaryn – diýýär-de, sözüniň üstüni ýetirýär: – Sebäbi siz ösen siwilizasiýa ýetjek bolup, ynsanyň gursagynda ýerleşýän iň ähmiýetli zadyny öldürdiňiz!

KYSSAHAN