Ol diňe enäniň ak süýdün bilýär.
Şondan başga zada ýetenok akly.
Ýöne onuň eýýäm adam ady bar –
Ýaşamaga hakly, iýmäge hakly.
Aglamaga hakly, gülmäge hakly.
Aglaýar çagajyk (bolsa-da erkek!),
Erkekleriň aglamaly däldigin
Bilenok köşejik, bilenok entek

Häzirlikçe goý, aglasa aglasyn,
Çagalara agy üçin temmi ýok.
Olar oňat düşünýärler bir zada
–Aglamasaň – wah, emme ýok, memme ýok.

Bilemok, adyna näme dakdyňyz
–Ajap atlar köpdür, ýene-de köp bor:
Ýöne at dakynmak aňsat-da bolsa,
Olara eýelik etmekde gep bar.
Arslan, Ýolbars diýip at dakdyk bir gün
(Şoňa mynasypdy ekizje oglan).
Ýöne on sekizden ötüp-ötmänkä
Biri tilki boldy, birisi şagal.
Ýene iki çaga at dakdyk bir gün.
Öňkä şükür etdik. Bu onça-da ýok:
Geçi bolup çykdy Serdar dakanmyz,
Batyr dakanymyz towşança-da ýok,
Ikisi-de gaçdy enesin taşlap:
Biri işden gorkdy, biri okuwdan
Birisi mäläp ýör Sibirde gagşap,
Beýlekisem agaç çapýar tokaýdan.
Onsoň iki gyza at dakdyk bir gün.
Ikisi-de çykdy adyndan arzan:
Misden arzan çykdy Merjen dakanmyz,
Altyn hem – bir gujak odundan arzan.
Dakyň çagaňyza iň ajap ady,
Seçiň-saýlaň täzesinden täzesin.
Ýöne çagamyzy at bezäp bilmez,
Goý, çagamyz öz adyny bezesin...