“Yşkyňda iru-giç jan berjek hassa,
Em ederden sen indi has uzakda”
                   Atamyrat Atabaýew


Neçün dymýaň?
Aýt ahyry bir zatlar
Jada çümen bu gijäniň şanyna!
Egsilmez arzuwlaň gujagna dolup,
Geldim gürleşmäne seniň ýanyňa.

Şonda, iň bolmanda, kalbymda galan
Mylaýym sözleriň duýgymy güýmär.
Yşkdan doly ýürek undar gussasyn,
Yşkdan serhoş başym bir pursat giňär.

Meni diňlemegi näme üçin söýýäň,
Arzuwlary gizläp goýup gursakda?
“Yşkyňda iru-giç jan berjek hassa,
Em ederden sen indi has uzakda.”