Doňan saçlaryň bäsleşigi
Kanadanyň iň çet nokatlarynyň biri bolan Ýukon ştatynda Tahini diýen ýer bar. Ol Alýaska bilen araçäkleşýär we öňler turistlar üçin känbir gyzykly däldi. Bu ýere gelmek kyn, ýadygärlikleri ýok, daş-töweregi diňe ellenmedik taýga we daglar. Şonuň üçinem Tahinide ýerleşýän geotermal çeşmeler dynç alýanlar tarapyndan köp gelinýän ýer däldi.

Emme geçen asyryň ortalarynda Alýaska ýol çekilmegi bilen hemme zat üýtgedi. Ol göni Tahininiň deňinden geçýär we ýol gurlandan soň bu ýer turistleri özüne çekip başlaýar. Aslynda geotermal çeşmelerde üýtgeşik zat ýok - ýeriň aşagyndan gyzgyn suwlar çüwdürip çykýar we iki sany basseýni doldurýar. Suwuň temperaturasy daşary nähili sowuk bolanda-da 47°C-dan pese düşmeýär. Hut şu ýagdaý hem bu ýerde dünýädäki iň üýtgeşik ýaryşlaryň biriniň, ýagny, doňan saçlaryň bäsleşiginiň döremegine sebäp boldy.

Ýaryş noýabr we mart aýlary aralygynda haçan-da daşarynyň howasy -20°C-a çenli düşende geçirilýär. Ýaryşyň şerti ýönekeý: suwa çümüp çykmaly we soňra derrew saçlaryňa üýtgeşik şekil bermeli. Islendik serişdelerden - darakdan, saç boguçlaryndan we beýlekilerden peýdalanmak mümkin. Esasy zat kelläňde adatdan daşary görnüş döretmek. Has dogrusy, ony size derek sowuk edýär. Soňra ýaryşyjy öz döreden gözelligini surata almaly.

Ýaryş bütin sowuk sezonda dowam edýär. Gatnaşmak isleýänlere diňe kurortyň administratoryna bellige alynmak we oňa suratlaryňy bermek zerur. Ýeňijileri köpçülik seçýär - kandidatlary administrasiýa saýlaýar, ahyrky ses berlişikde bolsa kurorta gelenler we ýaryşyň blogyny okaýjylar saýlaýar.

Konkursda birnäçe nominasiýa bar: ýekelikde düşürilen iň gowy erkek we aýal suraty, iň gowy toparlaýyn surat, iň üýtgeşik doňan sakgal we hatda iň gowy çaga suraty. Howwa, daşarynyň howasy käwagtlar -30°C çenli düşüp bilýän bolsa-da, ýaryşa çagalaram gatnaşyp biler.

Her nominasiýada ýeňiji bolan simwoliki 150 dollar sowgat alýar we iň esasysy-da kurorta indiki gezek geleninde uly göwrümli ýeňilliklerden peýdalanyp bilýär. Şeýlelikde administrasiýa turistleriň Tahininä her ýyl gelmeklerini gazanmak isleýär.