Gitme geçen ýollaryňa täzeden,
Yza dolanmaga gelmäniň üçin.
Gitme,
Ýürek barlygyňa öwrenişdi
Söýgi duralgaňda egläniň üçin.

Gitme,
Didelermiň gören bagtyny,
Gussaly bir buşluk bilen çalyşyp.
Gitme,
Başarmarsyň uzaklaşmagy
Söýgim saklar ýollaryňa çolaşyp.

Gitme,
Maňa getiren bu bagtyňy
Ýalňyz götermegi başarmaz gerden.
Gitme,
Söýgiň gözlerimde ýaş goýup
Nalamaýyn sensiz ykbaldan her dem.

Gitme,
Seniň bilen dünýäniň demin
paýlaşýakak,
entek ýetýäkä sabyr
Gitmesene,
Gözümiň öňünde ýaşa,
Entek gazylmanka garaňky gabyr.