Sensiz ýazmak nämä derkar,
Sensiz günden gün bolarmy?!
Gitseň, aýt, kim sebäp bolar
Gorjamaga duýgularmy?!

Gaýgylarmy kim çekişer,
Kim döküşer ýürek posun?!
Ynjydyber, çydaryn men,
Söýgimiz bir ynjamasyn!

Galp bolmasyn gatnaşygmyz,
Çatlamasyn kalp aýnasy.
Ýolumyza şugla salsyn
Ak ýyldyzlaryň gaýmasy.

Seresap bol, yşk näzikdir,
Bardyr näzi seniňkiçe.
Seniň üçin ýanyp gitdi,
Köýüp gitdi telim gije.

Adyňa ybadat edýän.
(Bilýän, munym uly günä.)
Sensiz günden gün bolarmy?!
Sensiz ömür ömürmi nä?!

Sapa HOMMADOW.