Kerim Gurbannepesow:
"Bir başyň bar, müň işiň bar dünýede,
Müň şükür ýykylyp, galmaýşyň besdir..."

Besdir.

Ýaş başym bar, müň gaýgym bar beýnide,
Şükür, Hudaý, yza galmaýşym besdir,
Ne many bar, oda ýanyp, köýmeden?
Hakymdan artygyn almaýşym besdir.

Dogry ýodalaryň yzyn yzlaýyp,
Armanym nä, gidip bilsem yz goýup?!
Ýüzüm güleninde, tenim syzlaýyp,
Geçeni aňymdan pozmaýşym besdir.

Tapyldy az-kände ýüzümi alan,
Minnetli berilse, ajaýar balam,
Ak kagyz üstüne çyrşamda galam,
Hak sözüň üstüni çyzmaýşym besdir.

Alla-ha dilegli uzanda golum,
Şükür, berilipdir, zehinli gorum,
Şeýtanyň ýolunda azan dostlarym,
Böwrüme dürtende, azmaýşym besdir.

Sähel kynçylyklar gyrmaz ganatym,
Her zadyň wagtynda geler nobaty,
Ýeňip bilmez, bahylyň gep-gybaty,
Geljege umydym üzmeýşim besdir,

Baýram BEJIDOW