Kim näme diýse-de diýibersin dost,
Ýalançyñ azda-kän çynlygyn bilýän,
Illeñ söýgi hakda diýýänleri rast,
Her näçe çümseñem çuñlugyn bilýän.

Gadyry ýokmuşyn arzan akylyñ,
Dahyly ýokmuşyn gymmat nakylyñ,
Beýniñi azdyrýan humar, çakyryñ,
Ömrüñe zyýanly, zeñligin bilýän.

Täzeçil düşünje, tăzeçil döwür,
Her kim niýetinden gözledi höwür,
Çepiñe çekseler sagyña ýüwür,
Zamanda ýalanyñ ýoñlugyn bilýän.

Bilimsizler geplär, bilimli dymar,
Betpäl peýdasyna, haýryna yñar,
Öz duýgyñ özüñe bakanda gyñyr,
Goşanlañ aýranña deñligin bilýän.

Bu dünýä oýunjak, utjagam bolmañ,
Baýlyk bir balykdyr, tutjagam bolmañ,
Diñe şükir edip ýatjagam bolmañ,
Sabyryñ umyda demligin bilýän...

Awtory: Baýram Bejidow