Güýz gijesi

Ýakanok köňüle güýzüň şemaly,
Noýabr gyş geljegini buşlady.
Ikindin kölgeleň uzaýşy ýaly,
Ýene-de gijeler uzap başlady.

Kelläňi sokmaga tapaňok deşik.
Nädip geçirmeli soňsuz gijäni.
Ýa keýwanyň bilen süýji gürleşip,
Sanap çykmalymy güýzde jüýjäni.

Ne gapyň kakylýar, ne-de penjiräň,
Howadanam beter ýüzüň gamaşýar.
Şeýle günler, meniň çakyma görä,
Sen birine, birem saňa garaşýar.

Otuz üç ýaş köňle müň gussa salar
Daşarda çygly ýel gitdikçe güýjär.
Bu şeýle bolupdyr. Şeýle-de bolar:
Günleriň gysgalyp,
Uzalýar gijäň.

Gurbannazar Ezizow