Bir gün meň ýoklugym duýular saňa,
Yza dönmejegmi bileňde, baky.
Sessiz gijelerde batarsyň gama,
Ne men dolanaryn, ne-de bir uky.

Bir gün meň ýoklugym duýular saňa,
Günler sähel kemäýse ýylgyrşyňy,
Peýdasyz galanda töwerek daşyň.
Ýatlarsyň sen, göwnüň tapyp durşumy.

Bir gün meň ýoklugym duýular saňa,
Tapylman söýgüde men dek aýnadan.
Köçäňizden ýat adamlar geçende,
Mendir öýdüp gararsyň sen aýnadan.

Bir gün meň ýoklugym duýular saňa,
Garagol şemalyň pyşyrdysynda.
Basmaga çalşarsyň kalbyň derdini,
Başagaý günleriň hysyrdysynda.

Öz bagtyňy özüň ýatyryp elin,
Nirdesiň, ne halda, bildirmez maňa.
Belki bagt taparsyň, taparsyň welin,
Bir gün meň ýoklugym duýular saňa.

Şanazar Hydyrow