Dünýäniň ýüzünde täsin bir millet,
Aýallar milleti,
Üýtgeşik dünýä.
Bular bilen oýun edäýmäň millet,
Bular köp zatlary öňünden bilýä.
Dynç alyş günleri ertir ir bilen
Gezelenje çyksaň, ýuwaşja güler.
Şol gün arpa suwun datjakdygyňy,
Zaluwatlar hökman öňünden biler.
Işden soň bir neme gijiräk galsaň,
(Adamçylyklyr-da bu bolup biler).
Ýüzüňi gyzardyp öýüňe gelseň,
– Geldiňmi? - diýer-de, ýuwaşja güler.
Işden öz wagtynda gelen çagyňda,
Çaý, çöregi bilen başyny eger.
Ondan soň: "Kakasy, bu nä ir geldiň,
Tüweleme" diýip, çetiňe deger.
Bular şerraýam däl, gaharjaňam däl,
Ownuk çalňyşlarňam göwnüne almaz.
Bularsyz dünýäde ýaşamak kyndyr,
Bularyň dilinden sypybam bolmaz.