Zenanlarymyz aglamasyn ýigitler,
   Külli älem aglar olar aglasa,
Eden-eýlänimiz bolmaz uğruna,
Naçarlaryň ýürekleri daglansa.
♡
Muşakgat ýagdyrmaz dünýäniň ýüzi,
   Ezizleriň göwünleri awlansa,
Ýoklukdan bar eden barlygyň özem,
  Zenan gülse güler aglar aglasa.
♡
Ajy gözýaş mähremlere ýaraşmaz,
Näzik ýürek ynjamasyn erkekden,
Bilýäňizä olarsyz ýok ýaşaýyş,
Boýun alyň ýeke zady erkek deý.
♡
Zenanlarymyz aglamasyn ýigitler,
Üzülmesin dutaryndan kirişler,
Goşa taryň owazyna heň bersin,
Söýgiden döreýän näzdir kereşme.
♡
Çekeliň olaryň näz kereşmesin,
Gyşyň doňun çözer olaryň näzi,
Güläleksiz, Gunçasyz, Bägülsiz,
Baharsyz baharlar ýaz etmez ýazy.
♡
Bilmezlik nähak degäýsek göwne,
  Öz ýaşyny özi sylmasyn naçar,
Bagra basyp gözden sylalyň ýaşy,
Ýogsa öý-ojakdan bereket gaçar.
♡
Zenanlarymyz aglamasyn ýigitler,
  Olar bezegidir içeriň-daşyň,
Şuny oýup ýazyň ýüzüne daşyň,
"Hasaby bar nähak dökülen ýaşyň".
♡
Ýönekeý ýaş däldir, ol dökülýän ýaş,
Belki-de ol, misli hünjüdir, dürdür,
Dürler köp dökülse bir zady biliň,
Erkegiň barlygy-ýoklygy birdir.
♡
Zenanlarymyz aglamasyn ýigitler,
Olar mydam biziň mährimize zar,
Aglamasyn käbe, gyz, dogan, ýar,
Aglamasyn namys, aglamasyn ar.

Awtory: Sädi Sädiýew.