Gadymy haýwanlar, hususan-da, dinozawrlar äpet göwrümleri bilen bellidir. Bu şol döwrüň tebigy ýagdaýlarynyň, howanyň amatlydygy bilen düşündirilýär.

Howada kislorodyň mukdary köp bolanda, äpet jandarlaryň ýaşamagy üçin amatly şertler döreýär. Uly göwrümli haýwanlaryň hereket etmegi üçin ýürek-damar ulgamy bilen dem alyş ulgamy köp möçberde kislorody işlemeli bolupdyr. Netijede, olar köp mukdarda energiýa sarp edipdirler. Şonuň üçin hem dinozawrlar ýaly örän uly jandarlar ýygy-ýygydan dynç almaly bolupdyrlar.

Howanyň üýtgäp, ýowuzlaşmagy bilen, uly göwrümli jandarlaryň ýaşamagy agyrlaşyp başlapdyr. Olaryň uzak wagtlap hereket etmäge ukypsyzdygy göçmegini kynlaşdyrypdyr. Netijede, kiçi haýwanlar howanyň amatly ýerlerine göçüp gidipdirler. Uly jandarlar bolsa uzak syýahata ýaramsyz bolupdyr. Bu olaryň ýok bolup gitmekleriniň bir sebäbi hasaplanýar.