Günleriň bir güni mugallym sapak otagyna giripdir-de, salamlaşandan soňra göni sapaga başlaman, talyplara ýüzlenip, “Talyplar, kim ejesi-kakasyny gowy tanaýar. Olaryň gowy görýän zatlaryny, häsiýetini bilýär? Bilýän bolsaňyz, eliňizi galdyryň” diýipdir.

Bu soraga geň galan talyplar “Heý-de, ejeň-kakaňy tanamanam bolarmy?!” diýip, ählisi elini galdyrypdyr. Mugallym bu soragyny ikinji gezek gaýtalapdyr, ýöne eje-kakany ene-ata bilen çalyşypdyr. Talyplaryň arasynda ene-atasynyň ähli häsiýetlerini, edim-gylymyny bilýänleriň sany azalypdyr. Toparyň deň ýarysyndan gowuragynyň bu gezek eli galmandyr.

Mugallym bu soragyny üçünji gezek hem sorapdyr. Ýöne bu gezek mugallym: “Araňyzda haýsyňyz eje-kakaňyzyň ene-atasyny tanaýanyňyz bar?” diýip, sorapdyr. Bu gezek ençeme talybyň içinden ýekeje bir talybyň eli galan eken.

Mugallym: “Görýärsiňizmi, men sizden ilkinji soragymy soramda siziň ähliňiz eliňizi galdyrdyňyz. Sebäbi siziň ähliňiz eje-kakaňyzy tanaýarsyňyz, olary görýärsiňiz, bile ýaşaýarsyňyz. Emma ikinji soragymda welin, deň ýaryňyzdan gowuragyňyzyň eliňiz galmady, çünki siziň araňyzda ene-ataňyzy görmedikler bar. Üns beren bolsaňyz, üçünji soragymda ýekeje bir talybyň eli galandyr. Şol talyp eje-kakasynyň ene-atasyny görendir öýtýärsiňizmi? Elbetde, ýok. Ol özüniň garry ene-atasyny olaryň bitiren işi bilen tanaýar. Şonuň üçin hem durmuşda şeýle bir işleri başaryň welin, hatda seni görmedik nesiller hem seni tanasyn, seni ýatlasyn. Seniň adyň ýitmesin” diýipdir.