Şu pursat hiç zadyň parhyn bilemok,
Özümi, dünýäni unudyp barýan
Şuwagt Innoplanetýan gardaş diýse-de,
Men oňa birjigem bolmaryn haýran

Şu pursatda asla haýranym bolmaz
Ýyldyzlar göz gyrpyp, gözden ýitse-de
Höwesim, haýranym bolmaz hiç zada
Agaçlar ädimläp ýöräp gitse-de

Belki diýýänlerme düşünen bolmaz
Bulary okanam oturyp güler
Goý, olar bilmesin, zyýany ýokdur,
Ýagdaýymy mydam Ýekelik biler

Ýekelik wepaly dostum bolupdyr
Käte içim ýakyp, kelläm ýarsa-da
Ynha, dek düýnjigem gürrüňdeş bolup,
Seýran etdik, Aýa, Güne, Marsa-da

Dertleşeli ýene oturyp bile
Ýat däl-ä sen, durmasana çekilip!
Bu gije-de myhman alaýyn seni
Meslekdeşim, ajap dostum, Ýekelik!


Ylham GURBANALYÝEW