Kim akylly saýsa özün,
Onda kän bir akyl ýokdur.
Aglamadyk adam ýokdur,
Aýdylmadyk nakyl ýokdur.
Gül açylmaz ýaz bolmasa,
Nädip oňjak näz bolmasa.
Bir çümmüjek duz bolmasa,
Hiç tagama ýokum ýokdur.
Yşyk gözläp, galyp tümde,
Kän zat gördüm bu ömrümde.
Her ýalpyldap ýanan şemde,
Ýagty bardyr –
Ýalkym ýokdur.
Tüweleme, dälsiň çaga,
Alym bolduň, bolduň aga.
Öz-özüňi tanamaga
welin, hergiz çakyň ýokdur.
Baýlyk ýygnap assa-assa,
At-owazaň arşa ýetse,
Aýnamagyn-Taňry tutsa,
Öz zadyňa erkiň ýokdur.
Ýene bir zat bize aýdyň,
Eger, "molla" bolup adyň,
Diňlenmese diýen zadyň,
Şondan ajy höküm ýokdur.
Agla-aldap alan bolsaň,
Eňre-ýasda gülen bolsaň.
Bu ýalança gelen bolsaň–
Gitmezlige hakyň ýokdur.
Berdinazar Hudaýnazarow