Uçup ýördük el berişip howada
Uly-uly arzuwlara başlaşyp
Söýgümizi tapypdyk biz sabada,
Öýle wagtam ýetip geldi - hoşlaşyk

Ol sabanyň günäsi-de ýok asla,
Gaýtam ol, päk söýgümizi duşurdy
Birden aýralygam geldi-de haslap,
Süýjäp başlan söýgümize diş urdy

Ah, indem...
Gutsyz göwnümi pa:ralap
Çekip ýörün şol dişiniň yzasyn
Sen bolaýsaň, kesselerem arylap,
Şübhäm ýokdur gezjegime - yzasyz

Men-ä seni köpden bäri tanaýan
Senem meni - menden gowy bilýäň-ä
Ýalňyz goýma, ýollaryňa garaýan
Dolansana,
dolansana,
dünýäme...!



Ylham GURBANALYÝEW