Kän aýtdym, aýdaryn soňky demimde,
Bir ömürlik goýup käbe deňinde,
Kemala getiren enäň öňünde
Ýüzüň çytyp bat bermegin sesiňe,
Hiç haçan,
hiç zadyň hatyrasyna.

Söz güldürer, asla gülmejek gy:zam,
Söz getirer, asla gelmejek gy:zam,
Ýöne bir haýyşym, almajak gyzyň
Degmegin gymmatly ar-namysyna
Hiç haçan,
hiç zadyň hatyrasyna.

Bir arzuw astynda ýatyp-oýanyp,
Kyn günüňde sütün kimin söýenip,
İki günlik gelen şana daýanyp,
Köne dost ýakasyn gysma gysyma
Hiç haçan,
hiç zadyň hatyrasyna.

Adam bolup geldiň, adam deý ýaşa,
Sözläňde çykmagyn çeniňden aşa,
Haram eti çeýnäp, zor berip dişe,
Ynsabyňy satma zer bahasyna
Hiç haçan,
hiç zadyň hatyrasyna...