"– Bir aýagy ýokmuş, balam, dyzyndan,
Eneň entek iren däldir gyzyndan".
"– Dyzyna berýäňmi gyzy oglanyň?
Maňa gerek zady ýüregi onuň".
"– Ýürek näme, syna sagdyn durmasa?"
"– Syna näme, ýürek batly urmasa?
Ýykman diýip wada edipdiň sözümi,
Aýralygyň agysynda özümi...."
"– Men beýle zatlary diýemok saňa"
"– Şol bolmasa her bir günüm ýas maňa!"

"– Şolmy indi bütin dünýäň diregi,
Iliňkiden artykmaçmy ýüregi?"
Neneň jogap bersin beýle sowala?
Düşdi gözel ýene agyr bir hala.
Gahar etdi, öz içini gepletdi,
Göz alardyp enesine seretdi

"– Sag wagtynda menem garşy bolmandym,
Ýadyňdadyr, sözüň ýere salmandym.
Emma bir maýyba gül ýaly gyzym,
Bermäge razy däl, diňleseň sözüm.
Ýedi biçip, bir kesilýän şu işdir,
Oýlanman iş etseň, puşmanyň hiçdir".

"– Mähribanym, eziz enem, gulak sal,
Ýedi biçmän, ýetmiş biçdim men ozal".
"– Müň-de biçseň keýgim, kelte biçipsiň".
"– Ýok, eje jan, aldaw meýin içipsiň".

Neneň diliň barýar diýmäge "maýyp?"
Eje jan, eje jan, dälmidir aýyp
Watan diýip gan döken bir gahrymana!
Seniň düşünşiňe, Begenç hamana
Agaçdan asylyp, ýa ýapdan böküp,
Ýa ýaglyga towsup, ýa gorpa çöküp,
Düýeden ýykylyp, palçykdan taýyp,
Gudurap boş ýere bolupmy maýyp?
Ýok, ýok, beýle däldir, oýlan, eje jan,
Biz üçin akandyr aýakdan al gan!"

AMAN KEKILOW "Söýgi" romanyndan