Telefondan gelýär seniň mähirden,
Aladadan dolup duran owazyň.
"Gyzym, galyň geýin, üşäýme birden,
Bilip bolmaz güýz gününiň howasyn!"

Nämedir bir zady küýsärin hem-de,
Uzyn asfalt ýoly giderin boýlap.
Asman aglap bolup ýagyş diňende,
Ötegçi şemallar saçymy oýnar...

Kalbyma müň dürli hyýal ekerin,
Ellerim kisämde, gözüm asmanda.
Ähli zatdan dilgir, bolýan ekeni,
Ynsan öz-özüne dözüp başlanda...

Telim soraglarym galar jogapsyz,
Soňsuz gussa bilen o:t alar içim.
"Şu günler adamlaň kalby sowapdyr,
Üşäýme!" diýsene, mähriban ejem! ...