Şu günler üýtgeşik duýga sepleşdim,
Düýn düýşümde ýylan bilen gepleşdim.

Diýdim: "Zäher neýçün saňa berildi,
Çakan zadyň sagat geçmän serildi.

Aýaksyzam bolsaň batly ýörediň,
Adamzada gorky bilen dörediň.

Bize berlen bolsa köp bordy derman,
Sagdyn borduk, beýle kösenip ýörmän".

Ýylan seretdi-de: "Pikir et..." diýdi,
"Hemem sen bir zada şükür et" diýdi.

Diýdi: "Zäher berlen bolsa adama,
Garaşmak gerek däl asla ýardama.

Dünýäni adamsyz soldurardyňyz,
Bir-biriňi çakyp öldürerdiňiz..."


Kerim Hally