Bolma

Hakyky dost özi birje bolarmyş,
Galany dost bolup soňra gülermiş.
Ýylan kimin süýnüp syryň bilermiş,
Bilýänin aňsaňda, ynanjak bolma.

Gowulygy bilmedige etseň-de,
Bilmese, özünden, gowulyk sende.
Allanyň rehimi inmedik bendä,
Biriniň derdine gynanjak bolma.

Derdi beren şypa bermän goýmaz hiç,
Kesel ýowdur şirin jana doýmaz hiç.
Derman ajy, süýji melhem bolmaz hiç,
Halypaň käýese zeýrenjek bolma.

Durmuş kyndyr, menzil alys, ýük agyr,
Kynçylyksyz bolmaz mal-mülk, gäw-sygyr.
Çydam et, agyrmaz bu ýürek bagyr,
Säher saba ýelne yranjak bolma.

Ýagşyny näbilýäň ýamany görmän,
Uny näbilersiň samany görmän.
Ylymlar dagynyň daşyny dörmän,
Çeşmesin suwundan ganaýjak bolma.

Näm üçin göz iki, birje berlen dil?!
Müň gez eşidenden, bir baryp görgül.
Utanç ýoldaş bolsa, Şirhan, ýat bilgil,
Başarmaz işiňe synanjak bolma.

Aly Şirhan Daýhan ogly
''Dünýäni öwürýän şygryma'' goşgular ýygyndymdan
(ähli hukuklary goralan).