Mukaddeslik

Maşgaladan başlanýar Watan,
Maşgaladan başlanýar geljek.
Maşgaladan başlanýar ömür,
Maşgaladyr goldawyň berjek.

Maşgalany deňeýän mydam,
Pula deňäp bolmaýan bagta.
Ynsan üçin maşgala dälmi
Tümlüklerden çykarýan ýagta?!

Maşgalanyň gadryny biliň!
Ýetim-ýesir ynsanlar näçe?!
Özge ýurtda ýörenler bardyr...
Maşgalasyn küýsänler näçe?!

Maşgaladyr edebiň başy,
Maşgaladyr bilim ojagy.
Maşgalanyň süýji her aşy,
Mähirlidir onuň gujagy.

Maşgala – bu ilkinji mekdep,
Agzalary saňa derslikdir.
Maşgala – bu birinji edep,
Maşgala bu Mukaddeslikdir.

Aly Şirhan Daýhan ogly

''Dünýäni öwürýän şygryma'' goşgular ýygyndymdan (ähli hukuklary goralan).