Birden gök asmana dikildi gözüm.

Ah, ol görnüş! Gözüm nämeler görýär.

Gül düzüň üstünden düzümde-düzüm,

Göwnüňi göterip, durnalar barýar…

Ezizow.

Ak asmanyň giňligin,
Güýzüň reňkin halaýan.
Ömrümiň her ýylyny,
Durna bilen sanaýan.

Boýun egip dünýäde
Höküm sürýän şol kada,
Gykuwlaşyp durnalar
Geçip gider Ýefrata.

Gözi bilen gulaçlap,
Bu Watany, bu çöli.
Geçip gider durnalar —
Bu ömrümiň bir ýyly.

Wah, uzakdyr, howpludyr,
Hatarlydyr bu ýollar.
Okdan ölen bir durna
Agyr hatardan galar.

Gyş geçip, ýazym geler,
Durnadyr gazym geler,
Geçen ýylymyň ýerne,
Gelmez atylan durna.

Ýüregimiň gussasyn,
Ýüregimiň azaryn
Jemläp, hiç wagt gelmejek
Durna üçin aglaryn...