Gyzlar dünýäsi.

Öň zamanlar bardy şeýle bir wagyr
Aňsadyna bakan Aýal-Gyz dogurar

Bu pikir gelýärdi örän uzakdan
Aýal gyzy hiç çykarman duzakdan

Diýseň-Gyzy boldy planyň-Äheý!!!
Ol bolmandyr-ow diýerler paheý

Gyz kişiniň maşgalasy ahyry
Adam hasap etmezler ol pahyry

Gyz ýurt goramaz Busar oturar
Abraý däl käte ysnat getirer

Gyzdan ýurt eýesi ýa-da nesil bolmaz
Gyzly uzak gülmez,ogully ölmez

Oguldyr atanyň arka daýanjy
Gyz dörän gününden alada ynjy

Şeýle wagyzlardan gulak ganansoň
Erbet nysak hakykata dönensoň

Eşidende atasy Göbek kes sözün
Igenç bilen aýdar Kesiň bogazyn

Ogul bolsa derrew Azan aýdarlar
Eşidenler ýör toýa diýip gaýdarlar

Gyz bolanda Azan Kamat aýdylmaz
Toý tomgy hiç ynsandyram üýdülmez

Müýnli bilar gyz dogran Aýal hem!
Gaýtargy bermäne etmez hyýal hem

Dogmasyndan ata göwnü şat bolmaz
Gyz dogdy dogmady parhyny bilmez

Enesem gyzyna etmez kän geleň
Çem gelen ýerinde ýatar baş ýalaň

Açlykdan gyz pahyr aglasa ýekän
Diýerler-Lal bolda ýat-ýer çeken

Lak atanlar diýer-Başyň sogrulsyn
Paheý janyň çyksyn-Boýnuň omrulsyn

Ýylgyryp bökejekläp gelsede gola
Ele almaz diýer Jähennem bola

Ogul ýaly görülmez gyz gowurak
Mahlasy tutular saýak sandyrak

Gülüp oýnamaga ýarap başlansoň
Özün bilip hapalygy taşlansoň

Hajyk hujyk bir azajyk bakylar
Manjuk dagdan näzik boýuna dakylar

Bu nä-başy kesilen diýip taşlarlar
Kem kem welin iňirgenip başlarlar

Alty ýedi ýaşda bogup-Gulpagyn
Iýers-diýrler munyň ýagly çelpegin

Tur otura ýarandan soň neýlärler
Ýumuş buýrup bir werziş eýlärler

Enesi öwreder oturşyn turşyn
Gulpagyny göýberip saçyny örşün

Birnäçe wagt gezer-Bökejekläp towsup
Gulpagyny tasadyp ger ýana öwsüp

Bagy üzülip dökülmese hünjüsi
Hiç bir zatdan bolmaz onuň ünjüsi

Şol wagt göýä bir açylýan Gunça
Oýun edip degişerler käte ençe

Çekinmezler ýalan ýaşryk öwmekden
Gandyrlar gulagny satyp sowmakdan

Baý bu gyza örän gymmat bahadyr
El ýetmejek iň ýokary şahadyr!

Bermeris hiç kime bolmasak belet
Agalary geýer ýüpekden halat

Salmarys gapydan her öňi ýeteni
Ýeňňelerine getirmese keteni

Her gün şeýdip köp degerler oýundan
Gägirip doýarys diýip çelpek toýundan

Kä agladyp Käte-Käte söýerler
Satylmany şol wagt boýna goýarlar

Yhlas bilen iş öwreder ejesi
Gündiz keşde,ik egirder gijesi

Ýüňüň gowsuny darap çüprek tüýtmesin
Dokma ýuwrup gerip haly çitmesin

Mahlasy birkemsiz ugradyp işe
Öz gözünden salman saklar hemişe

Göze görünip ýetişensoň gyz halky
Gülüp oýnap gezmäge hiç ýok haky

Adam barka geplemäge utanar
Myhman gelse derrew beýlesin öwrer

Elek çelek bakmaz dört ýana garap
Gabagyn galdyrman otyr sülmüräp

Dört tärim el işi bir tenha sözi
Täleý takdyr hakda diňlenmez sözi

Şeýleräk bolsada gyzyň ykbaly
Aýry bolar garyp baýyň ahwaly

Barly ýerden:Baýdan-Begden-Handan
Sawçy gelip başlar o ýan bu ýandan

Alandan soň gelýänleriň habaryn
Sorarlar düýplije tanşy ýar ýerin

Diýerler:Nesibäň bolsa ýetersiň
Gaýdyp ýene-de bir habar tutarsyň

Dernärler nähili kowmun tiresin
Iglik-gulluk soňam boýun göwresin

Azajyk göz ýetse bir şikesine
Gelme diýip ýol taparlar dessine

Gowün ýetse bir zadyna ýerbe-ýer
Güýjüň bolsa diýrler-durma geliber!

Kesmek üçin gyzyň malyny uly
Ýygnanşyp gelerler dört bäş ýaşuly

Gyz atasy çagyr kowum gardaşyn
Ýaşuly ýaşkiçi ýakynyň daşyň

Iki ýan gerilişip çaý paý içerler
Ýüzden-ýüzdrn galyňyn biçerler.


Goşgyň dowamy inniki postlarymda nesip bolsa

Bellik:Gaýrat edip Awtoryny bilýänem bolsaňyz ýazmaň goşgy gutoransoň ýazjak!!!