Şowsuzlyk birýandan etimi iýýär,
Birýandanam kynçylyklar basyp dur.
Her kime mylaýym gülenem bolýan,
Bilmedim näme üçin ýürek gysyp dur ?!

Kime baksaň derdi özüne ýetik,
Göterýän deý dünýäň agyr ýüküni.
Dost diýenlem pyşyrdaşyp men hakda,
Beýlä baksam edip durlar gepimi.

Ham-hyýala berilmişem bu başym.
Çykalgasyz dälmişin-ä ähli zat.
Takyk sözi aýtýanlary göremok,
Eşitýänlerim "howwa, mümkin, ähtimal".

Sebäp gözläp bahanalaň içinden,
Ähli ýerden hakykaty agtaýan.
Men kynlary ýeňip geçerin bir gün,
Bu ýüregim urup dursa togtaman.

Bahyl gepin diňlemezem gulaklam,
Ýalanlara şam bolmasyn gül ömrüm.
Goý, bagtymy arzuw etsin erte-de,
Meň halyma göhi gelip gülenleň.

Ençe jebirlerden eýlenen dünýe,
Başyň sypap kä-te eliň gysyp dur.
Aljyrap kä halat gülenem bolýan,
Bilmedim näme üçin ýürek gysyp dur ?!