Käte güler ýüzüñ solanda gamgyn,
Saña beren güllerimi ýada sal.
Ynjama sen, kalbyñ galanda ýalñyz,
Seni söýen günlerimi ýada sal.

Göwniñi ýykanda indi ol özge,
Añýanyñ bolmasa bakyp gözüne,
Gulak goýup şol öñküje sözüme,
Seni söýen günlerimi ýada sal.

Mensiz uzak ýoda ýatyr öñüñde,
Baryp bilmen, durup bilmen deñiñde,
Birden meni duýsañ alan demiñde,
Seni söýen günlerimi ýada sal.

Ýatlamalar galar, ýük bolup arka,
Ýörärsiñ bagtyña, ýörärsiñ ertä,
Keşbim, sesim küýsäm wagtyñ birdenkä,
Seni söýen günlerimi ýada sal.

Soñky sözüm aýdýan dolup damagym:
Çözle öz geljegiñ täze ýumagyn,
Soñ-soñ ýaşlar sypalaýsa ýañagyñ,
Eliñ tutan ellerimi ýada sal.

Durmuşdan kä ejizleseñ, ýadasañ,
Seni söýen günlerimi ýada sal...

awtor : Şanazar Hydyrow