Sensiz aýralygyň ýasyn tutdylar
Sagatlar, minutlar, sekunt hemmesi
Gury gaýnag suwdan peýda bolmaz-a,
Tagamyn bermese yşgyň şemmesi

Gaz geler, durna gider...
Ömür öter...
Geçip gider bu ýaşlygyň göçgüni
Söýgümizi aýralykdan goraly,
Sönmän durka kalbymyzda uçguny

Has-da artyk eken sada söýgümiz,
Öten-geçenleri jemledip görsem.
Goparar gazygyn daňylan duýgym,
Gatap galan kalby nemledip bilseň.

Wagtyň zalymlygyn özüň bilýänsiň,
Ajap günlermizi alsa bermez-ä!
Kowaly biz bile, güýjümiz jemläp
Goý, gitsin aýralyk barsagelmeze...


Ylham GURBANALYÝEW