Aň hem Ýürek

Haýran men—Aň hem Ýürege,
Gelsek-de bile ýaşaşyp.
...Basdaş olar bir-birege,
Bilmeýärler ylalaşyp...

Käte, ýok zatlar barada,
Ýerli-ýerden dawa salýar.
Maňa kyn—iki arada,
Bolýar, diňe maňa bolýar.

Bilmen, kime ynanjagmy,
Ikisi-de gaty ýeser.
...Birisi—böwrüme sanjy,
Biri—başyma derdeser!

Ýürek urup gürs-gürs,
Diýýär „Meňki dürs,dürs!”


Olary göterdim ýördüm,
Apalap, gursakda-serde.
Olar bolsa, meni kör dek,
Idip ýörler islän ýerne...

Alajym ýok, tapamok tär,
Şeýdip, edip ýörün mydar.
Bilmedim, haýsy hyzmatkär?
Bilmedim, haýsy hökümdar?

Aň hem etjek düňle meni,
Diýýär „Diňle, diňle meni!”

Ýoldaş haýsy—menzillerde?
Haýsysy meni terk etjek?
Sal haýsy—durmuş deňzinde?
Haýsysy meni gark etjek?



Ikisiniň sazlaşygy,
Häzir juda gerek maňa.
...Aň derdimi aňlaşsady,
Düşünsedi Ýürek maňa...