Ýer ýüzüni buz tutsa-da,
Gün dogman geçmeýär gyşda.
Ýamanlañ sany artsa-da,
Gowularam bar durmuşda.

Ýaşaýyşda müñ kynçylyk,
Ynam-ýok, ýok-mümkinçilik.
Etmejek hiç müñkirçilik,
Gowularam bar durmuşda.

Enesini aglatmaýan,
Söýenini har etmeýän,
Ýamanlygy "kär" etmeýän,
Gowularam bar durmuşda.

Halal lebzi bilen gerçek,
Hormat edeniñe degjek,
Bergisin diýdirmän berjek,
Gowularam bar durmuşda.

Men-menlikden aýnamaýan,
Adam aldap, oýnamaýan,
Kalba mähir gaýmalaýan,
Gowularam bar durmuşda.

Sogaba galpyldap duran,
Nur ýüzi ýalpyldap duran,
Ýer şaryny pyrlap duran,
Gowularam bar durmuşda.

awtor : Şanazar Hydyrow