Eşege bal berme, ýalta ýal berme,
Oýnatgy adama asla ýel berme.
Gül bilen gyzganyñ parhyn bilmeze,
Gadyr etjek bolup, gunça-gül berme.
* * *
Öwünme sen öñde galgaýan diýip,
Siñegi-de atyñ eýerne daksañ.
Sähelçe salymdan ummadan çykar
Özi şol siñekdir, aslyna baksañ.
* * *
Köneleri kötekleme dannawsyz,
Aga ak diýeli, gara-da gara.
Bu göller älemi guwandyrmazdy,
Bolmadyk bolsady aslynda tara.
* * *
Gidiberse, gylaw alyp gomparyp,
Pyýadañam perzi çykýan wagty bar.
Emma dahyly ýok öziniñ oña,
Ony süýreýän oýunçyda bagty bar.
* * *
Eger öziñ özgä ýagşylyk etseñ,
Men_ä märekede magtanma diýjek.
Eger özge saña ýagşylyk etse,
Ile buşlamaga ýaltanma diýjek.
* * *
Ömür diýen zadyñ goşga meñzeýär,
Baha berilmeýär sany boýunça.
Adam emri ýaly, goşgulara-da,
Hyrydar tapylar many boýunça.
* * *
Dili ýersiz ýaýnatma,
Bişen aşy gaýnatma.
Ynanyp öwgüsine,
Ala gözüñ oýnatma.
* * *
Dama-dama köl bolar,
Hiç dammasa köl bolar
Boz ýerde biten däne,
Dok mädeli, bal bolar.
* * *
Bir agaçdan bag bolmaz,
Ýa baýyrdan dag bolmaz.
Bet niýetli göribiñ,
Keýpi ömür çag bolmaz.
* * *
"Gel!" diýmezden, getirse bor.
"Git!" diýmezden, giderse bor.
Her bir sözüñ aýdylşynda,
Her basymda müñ many bar

Ata Atajanow