Sen maña başga bir göz bilen gara,
Çeşmäñ gözbaşy deý, arassa bolsun.
Gahardan däl, ak säherden ýugrulan,
Ala gözleñ maña elmydam gülsün.

Gülüp durkañ, käte, bakýarsyñ öçli,
Muny gülüm gözleriñden añýaryn.
Jöwzaly tomusyñ tüp yssysynda,
Misli sowuk garaýşyñdan doñýaryn.

Sowuk garaýyşlar ýürege sanjy,
Owalbaşda maña berjek jepañmy?!
Gapyñy kakamda adyñy tutup,
Syrly garşylaýşyñ maña wepañmy?!

Sen maña başga bir göz bilen gara,
Habar bersin ol ýeke- täk söýgüden.
Orta ýolda maña sataşan läläm,
Halas eýle meni agyr duýgudan...

Allaýar Çüriýew