Söýgiden gelýäris,
Barýarys söýgä.
Ýerden döräp
ýere gidilişi ýaly.
Şoñ bilen beýikdir - adam niýeti.
Şoñ bilen gözeldir - adam hyýaly.
Söýgi oýun däldir.
Synagdyr söýgi !
Her ýeten , oñ ýükün göterip bilmez.
Söýgä mynasyplar göterer söýgini,
Söýgi ejizleriñ golundan gelmez.
Biz bu dünýä, goja diýýäs käýarym,
Emma dünýä , görşümiz deý
ýaş bügün!
Söýmedikler-
ýaş dünýäde gojadyr !
Söýen sürer goja dünýäñ ýaşlygyn,
Ol bu dünýäñ iñ mukaddes mirasy,
Ýaman niýetlerde ,
sowukdan,
otdan.
Gorap, bize gowşurypdyr sag-aman.
Dünýe özgerip dur,
Bulutlar göçýär,
Agaçlar guraýar,
döreýär agaç.
Adamlar ölýärler,
döreýär adam.
Bu şeýle bolmaly.
Ýok başga alaç!
Söýgi üçin tebigatda kanun ýok.
( Bilemok, ol tebigatyñ özümi)
Men- adam:
söýgiden döredim başda.
Söýgi diýbem
ýumaryn men gözümi.
Bilýän,
adam alyp şöhläñ tizligin,
Uzak- uzak dünýälere ýol salar.
Yzda belent köşkler,
otlar,
deñizler.
Iñ beterem,
belent adamlar galar.
Aýlanar ol,
Akmaýanyñ ýoluny.
Arşyñ tümlüginden etmez ol heder.
Ol diñe
Ýer diýen planetada
Galan näzik söýgüsini ýat eder.
Ylym şeýle diýýär: ýüz ýyllar ötüp,
Ol dolanyp geler dogduk diýara.
Emma
dost- garyndaş, dogany bolmaz,
Oñat sözler aýtmaz söýgüli ýara.
Dört- bäş ýyl nesil ötüp giden dünýede
Ol - geçmişden gelen-
geñ galar ýörer.
Ýöne ol her ýürek
her bir ynsanda !
Şo-ol tanyş söýginiñ yzyny görer.
Neslim!
Bir arzuwym:
Belentdir söýgi!
Söýen kişi üçin , belent bolma bar.
Ol seni döretdi, arşa göterdi.
Indem söýgi üçin, sensiñ jogapkär.
Söýüñ!
Söýüñ!
Söýüñ! Aýly gijeler,
Aýsyz gijelerem söýüñ ýadaman.
Biziñ bu gazaply ýigriminjide,
Örän uly söýgi gerek adama.
Söýgiñ güýji bilen aýlanýar zemin,
Elbette bu güýje telpek goýmaly!
Güýç diýmek - ýagşylykdyr,
Ýagşylykdyr söýgi ,
Ýaşlyk-
belent hem arassa söýmeli!
Goja Galileýiñ aýdyşy ýaly :
Her niçik- de bolsa, aýlanýar zemin.
Ýöne şindilerem ýaşaşyp ýörüs
Ýagty hem garañkyñ serhedinde biz.
Bir ýerlerde:" Ene nan!"
( Söýgini halas ediñ!)
Bir ýerlerde: " Eje jan !"
( Söýgini halas ediñ!)
Arap ýigdi zyndanda
ahmyr bilen urunýar.
Oñ dilinde: " Eý, penam!"
( Söýgini halas ediñ!)
Azan
Azan bolmasyn!
Mauthauzen bolmasyn!
Şatlyk,
hasratym asyr!
( Söýgini halas ediñ!)
Näçe kyn bolsa-da kyn
Ýeriñ geljegi üçin,
Nesliñ boljagy üçin,
Ähli ýaman we şer işden
Söýgini halas ediñ!
Halas ediñ!
Halas ediñ söýgini!
Ähli bela- beterden gutaryñ!
Göteriñ söýgini!
Halas söýgini
Ýedinji materik edip göteriñ!

GURBANNAZAR EZIZOW