DÖRT SANY ADAM
(Erkin şygyr)

Beýnimiň içinde dört sany adam,
Her gün kelle döwýär
Goşgularyň üstünde:
Biri goşgy ýazýar,
Biri okaýar,
Biri tankyt edýär,
Biri redaktirleýär.



GÜNBATAR PEÝZAŽY

Iň soňky pursatda berýär nuruny,
Iň soňky pursatda ýüzýär deňizde.
Indi onuň daýanmaga güýji ýok,
Günbatardan gaýdyp gelmez gündize.

Emma gitmegini islänok asman,
Gussasyndan gyzyl bolup ýanýardy.
Guşlar bolsa onuň mährinden doýman,
Bulutlaň içinden uçup barýardy.

Emma gitmegini islänok şemal,
Ýelleriň sesleri pes eşdilýärdi.
Deňiz kenarlara urunsam diýýär,
Deňiz öz-özüni köşeşdirýärdi...