Gelin toýunyň gutlagy


Çary gardaş saýlap alan dildaryň,
Gollary hünärli, kuwwatly bolsun.
Bar arzuwy bolsun - seniň didaryň,
Didaryň görende ganatly bolsun.

Hat sowady az bolmasyn dokuzdan,
Hamy kümüş, eti bolsun dykyzdan.
Perzentler döresin ekiz-ekizden,
Hemmesi egsilmez döwletli bolsun.

Puluň dargatmasyn sow diýp berseň,
Köjä döndermesin tüwi diýp berseň,
Egin-eşikleriňi ýuw diýip berseň,
Ýuwman seräýmesin! Paýhasly bolsun.

Okasyn gazýeti, görsün kinony,
Göwnüne almasyn az-küş kinäni.
Gaýyn ata bilen gaýyn enäni
Gözünden salmasyn, hormatly bolsun.

Geýmäwersin iki metr "tahýany",
Bolsun obaňyzyň zarpçy daýhany,
Gülüp garşylasyn gelen myhmany,
Saçagy müň dürli nygmatly bolsun.

Üstüne gün dogdurmasyn ýatanda,
Göwnüňi götersin habar gatanda,
Garramasyn elli ýaşa yetende,
Elmydam gujagy jennetli bolsun.

Göwni tämiz bolsun, - ýarasyn köpe,
Kän ýakyn barmasyn gybata gepe,
(Şondanam ägä bol, eý Çary şepe)
Atly hem abraýly, şöhratly bolsun.

Işden gelseň nahar etmän goýmasyn,
Burçun atsa, duzyn atman goýmasyn.
Çaý berende çaýyn atman goýmasyn,
Bişiren tagamy lezzetli bolsun.

Dogduk depesiniň bilbili Çary,
Saýlapsyň, alypsyň mynasyp ýary.
Ýar gadryny bilmek - är kişiň käri,
Elmydam dilleriň şerbetli bolsun

Oňat gelin oňat ýigde täç bolar,
Iki oňat - egsilmeýän güýç bolat.
Bir tarapyň oňatlygy hiç bolar,
Iki tarapyň-da  söýgetli bolsun.

Eçil bugün Tüýli gardaş, Täç daýza,
Bugün malyň gysganmagyn hiç daýza.
Myhmanlaryň bolaýmasyn aç daýza,
Nahar daşa! Myhman gurbatly bolsun.


Kerim Gurbannepesow