Adamzadyň ömür ýoly ýazylar
Eneden dogulyp çyrlan çagynda
Artyk-kemi saňa görä düzüler
Çarhypelek çarhyn pyrlan çagynda

Janyň berler, ýanynda-da kazasy
Her günäňe laýyk bolar jezasy
Hiç aýrylmaz ýadawlygyň yzasy
Maňlaý däl, ýüregiň derlän çagynda

Halal ýollar kynlyk bilen söküler
Zähmetiňe görä rysgal döküler
Arzuw mugt, bolsady mydam ekiler
Dok garynly dilleň gürlän çagynda

Garyn doýar, emma doýmaz garaklar
Gözbaşy dynmasa akar bulaklar
Ýolbarsdan kem bolmaz garagulaklar
Tanyş ýolbarslaryň arlan çagynda

Nätjek, kynlaşsa-da barha bu halat
Haka sygyn, mydam bolar delalat
Bilmen, belki bir gün bolar adalat
Hemmeleň wyždany parlan çagynda


Ylham GURBANALYÝEW (2021)