Belanyň körügi asyl özümiz
(Bir yaşulynyň gürrüñinden)


Öz edebimiz-ä ýatdan çykardyk
Her wagt diýdik "edepli bol" sözümiz
Çaga diýleni däl, edenmiz etdi
Belanyň körügi asyl özümiz

Iki söziň biri sögünç söz boldy
Edep hakda gürlemedi dilimiz
Çaga bolsa bizden eşdenin aýtdy
Belanyň körügi asyl özümiz

Erbetlik etdi, aý çagadyr diýdik
Düşündirmedik,
çytmadyk ýüzümiz
Çytylmadyk ýüz üýtgetdi edebin
Belanyň körügi asyl özümiz

Diýen etmedi
Gep gaýtardy gaýtam
Gerek ýerinde galmady elimiz
Galynmadyk el özümize degdi
Belanyň körügi asyl özümiz

Perzentden edipdik dag ýaly tama
Haklanmady haklanmaly duzumyz
Haklanmadyk duzdan gözlendi günä
Belanyň körügi asyl özümiz

Garranda perzentler ot bolar öýtdük
Öçmez diýdik ojakdaky közümiz
Emma ne közi galdy, ne-de küli
Belanyň körügi asyl özümiz

Galdyk ogul-gyzsyz....
Çalaran saçlar
Geçip gitdi ençe bahar-güýzümiz
Geçen bahar-güýzden gözledik günä
Belanyň körügi asyl özümiz

Şeýdip ömri ötýär ondan-biriniň
Ahmyr bilen geçer garran çagymyz
Ahmyrly ötmegiň sebäbi ýeke
Belanyň körügi asyl özümiz

Tertipsiz bolmaz edeplenen ogul
Tertipsiz bolmaz edeplän gyzymyz
Bolaýsa edebiňde hata bardyr
Belanyň körügi asyl özümiz

Haýyşym edepsiz galmasyn perzent!
Zaýalanmasyn geljegmiz, ilimiz
Çagadan öň özümiz edepläliň!
Belanyň körügi asyl özümiz


Ylham GURBANALYÝEW (2021.02)