Adamlar barha azgyn bolarlar,
Ýakyna gelende ahyrzamana.
Şeraba, humara maýyl bolarlar,
Ýakyna gelende ahyrzamana !

Atadan-eneden perzendi bizar,
Söwdägär aýaldan doludyr bazar,
Lolyhana döner akar suw boýlar,
Ýakyna gelende ahyrzamana !

Aýallar erkekleň lybasyn geýer,
Äjit-mäjit adam etini iýer,
Adamlar Hudaýa däl, detjala uýar,
Ýakyna gelende ahyrzamana !

Jahyllar okamaz, gaçar ylymdan,
Ýüz sowmaz arakdan, nasdan, çilimden,
Dünýäň ýüzi dolar nähak ölümden,
Ýakyna gelende ahyrzamana !

Mollalar Gurhany okamaz, çaklar,
Tabyt götermezler ulaga ýüklär,
Ölenler janlydeý suratda geplär,
Ýakyna gelende ahyrzamana !

Ekinde boý galmaz, şemalda hazan,
Toý tomaşa, ýasda ýuwulmaz gazan,
Minara çykylyp okalmaz Azan,
Ýakyna gelende ahyrzamana !

Baýtalda syrt galmaz, sygyrda göwüs,
Çöllerde gurt galmaz, meýdanda tawus,
Erkekde erk galmaz heleýde nebis,
Ýakyna gelende ahyrzamana !

Gaflatda geçer ömrüň köpüsi,
Gymmat bolar ajy zatlaň bahasy,
Oýanyň, ýapylar towa gapysy,
Ýakyna gelende ahyrzamana !